An tSeirbhís Aistriúcháin

Mar gheall orainn

Freastalaíonn an tSeirbhís Aistriúcháin ar riachtanais Ollscoil na hÉireann, Gaillimh. Sa tSeirbhís Aistriúcháin, cuirtear seirbhís aistriúcháin agus sainchomhairle teanga ar fáil don Ollscoil a chuireann ar a cumas reachtúil maidir leis an dátheangachas a chomhlíonadh. 

Treoracha chun an tSeirbhís Aistriúcháin a úsáid

Má theastaíonn ár seirbhísí uait, féach na treoracha seo:

• Seol an comhad Word atá le haistriú nó le profáil agat ar ríomhphost chuig aistriuchan oegaillimh.ie. Ní ghlacfar ach le cáipéis Word, fiú mura bhfuil i gceist ach cúpla focal/téarma. 
• Cuirfear foirm iarratais chugat. Tá cóip den fhoirm le fáil anseo freisin. 
• Líon an fhoirm sin agus seol ar ais í. 
• Clárófar d’iarratas ansin agus tabharfar uimhir ar leith dó. 
• Déanfaidh na haistritheoirí teagmháil leat má bhíonn deacracht ar bith ann. Bíonn beirt aistritheoirí ag plé le gach aistriúchán. 
• Seolfar an t-aistriúchán ar ais chugat a luaithe a bheidh sé aistrithe agus athléite.
• Is faoin té a rinne an t-iarratas formáidiú a dhéanamh ar an aistriúchán chun go mbeidh sé ag teacht leis an mbunleagan.

Coinníollacha

Seo a leanas an t-ord tosaíochta a bhaineann le hobair na Seirbhíse Aistriúcháin:

     (A) Dualgais OÉ Gaillimh faoi Scéim Teanga OÉ Gaillimh,
     (B) Dualgais reachtúla OÉ Gaillimh faoi Acht na dTeangacha Oifigiúla 2003, 
     (C) Dualgais reachtúla OÉ Gaillimh faoi Acht na nOllscoileanna 1997, 
     (D) Aistriúcháin a thagann faoi réir pholasaí na hOllscoile maidir le campas eiseamláireach  dátheangacha a chruthú. 

• Baineann castacht agus dua le haistriúchán ar chaighdeán ard; nuair a bhíonn cáipéis nó ábhar atá le foilsiú nó le cur ar  fáil do dátheangacha á phleanáil agat, ba chóir, dá bhrí sin, dóthain ama a chur san áireamh le haghaidh sholáthar an leagain Ghaeilge.
• Caithfear an tSeirbhís a chur ar an eolas a luaithe is féidir roimh ré má tá a fhios agat go mbeidh deifir le cáipéis éigin ach nach bhfuil an cháipéis sin réidh fós sa bhunleagan Béarla. Ní sheolfar aon aistriúchán ná profáil ar ais an lá céanna in aon chás.
• Chun a bheith cinnte siúráilte de go bhfuair an tSeirbhís d’iarratas bain úsáid as an áis Request read receipt ar do ríomhphost.
• Ba chóir tús áite a thabhairt don leagan Gaeilge in ábhar dátheangach. Tarlaíonn sé go minic go mbíonn an leagan Béarla léite ag daoine sula bhfeiceann siad go bhfuil sé aistrithe. Mura bhfuil Gaeilge ag duine leanfaidh siad ar aghaidh go dtí an leagan Béarla. Tá sé seo fíor go háirithe maidir le hábhar a sheoltar amach chuig All Staff.
• Má sheoltar an t-ábhar amach i mBéarla cuirfear an t-iarratas ar aistriúchán ar ceal.
• Is seirbhís phrofála amháin a chuireann an tSeirbhís Aistriúcháin ar fáil do na haonaid san Ollscoil atá ag feidhmiú trí Ghaeilge.

Eolas Teagmhála

An tSeirbhís Aistriúcháin,
Acadamh na hOllscolaíochta Gaeilge,
An Cheathrú Rua,
Co. na Gaillimhe.
Guthán :  +353 (0)91 595101 (Mairéad)
Ríomhphost: aistriuchanoegaillimh.ie

• Séanadh
• Ráiteas Príobháideachta
• Cóipcheart
• Inrochtaineacht