Conchúr Ó Giollagáin, MA, PhD (NUI)  

Teideal:  Ionad:   Uimhir Fón: Uimhir Facs: R-phost:

Ceannasaí Aonad na Pleanála Teanga Acadamh na hOllscolaíochta Gaeilge, An Cheathrú Rua, Co. na Gaillimhe, Éire. 00 353 91 595807 00 353 91 526509 conchur.ogiollagainoegaillimh.ie

Beathaisnéis

Is as Baile Átha Cliath do Chonchúr.

Tá cónaí air ar an gCeathrú Rua i gConamara. Chaith sé tréimhsí éagsúla ina chónaí i Ráth Chairn, Co. na Mí, i Lublin na Polainne agus in Toronto, Ceanada.

Is é an stiúrthóir acadúil é ar an MA sa Phleanáil Teanga atá á reáchtáil ag an Acadamh. Tá tograí éagsúla taighde ar an nGaeltacht chomhaimseartha curtha i gcrích aige, idir staidéir chanúineolaíochta, antraipeolaíochta agus shochtheangeolaíochta. Cuireann sé suim ar leith i socheolaíocht pobal teanga agus sna dinimicí cainte a chleachtann siad. Tá spéis aige freisin i stair chultúrtha agus intleachtach na hÉireann, i litríocht na Nua-Ghaeilge agus i ngnéithe éagsúla den ealaíon agus léann dúchais a chleachtar i gcultúir éagsúla.

Chaith sé seal ina léachtóir i Roinn na Gaeilge, Coláiste Phádraig, Droim Conrach, Baile Átha Cliath, agus i Roinn an Léinn Cheiltigh in Ollscoil Chaitliceach Lublin sa Pholainn. Ba bhall páirtaimsearatha de Scoil na Gaeilge i gColáiste na Tríonóide é, agus ag an am céanna bhí cúraimí Bhord na Leabhar Gaeilge air. Ba i 1997 a bhain sé a chéim dochtúireachta amach sa Choláiste Ollscoile, Baile Átha Cliath, áit ar oibrigh sé mar chomhalta teagaisc i Roinn na Nua-Ghaeilge.

Is comhalta seachtrach é den Institiúid Náisiúnta um Anailís Réigiúnach agus Spásúil (NIRSA) in Ollscoil na hÉireann, Má Nuad, agus is comhstiúrthóir é ar an tionscnamh taighde sochtheangeolaíochta atá á mhaoiniú ag an Roinn Gnóthaí Pobail, Tuaithe agus Gaeltachta: ’Staidéar Cuimsitheach Teangeolaíoch ar Úsáid na Gaeilge sa Ghaeltacht.’ Is ball é de Choiste Comhairleach i bPleanáil Teanga de chuid Údarás na Gaeltachta agus d’fheidhmigh sé freisin mar chathaoirleach ar Choiste Stiúrtha Thionscnamh na Pleanála Teanga i Ráth Chairn, Co. na Mí. 

Is féidir liosta foilseacháin agus ábhar taighde a fheiceáil anseo: Liosta Foilseacháin

• Séanadh
• Ráiteas Príobháideachta
• Cóipcheart
• Inrochtaineacht