M.A. / Dioplóma Iarchéime (Ateangaireacht Chomhdhála)

Cód PAC

Leibhéal an chúrsa

Fad an chúrsa

Líon áiteanna atá ar fáil

Dáta tosaithe 

Cur síos ar an gclár

Clár lánaimseartha atá i gceist a ritheann thar bhliain acadúil amháin i gcás an Dioplóma Iarchéime agus thar bhliain iomlán amháin (Meán Fómhair go Lúnasa) i gcás an MA, agus is trí Ghaeilge atá an clár á chur ar fáil. Déantar dianchleachtadh ar cheird na hateangaireachta le linn an chúrsa. Is iad an Ghaeilge, an Béarla, an Fhraincis agus an Ghearmáinis atá á dtairiscint i mbliana mar theangacha gníomhacha agus éighníomhacha ateangaireachta sa chlár seo. Is Gaeilge agus/nó Béarla a bheas mar theanga ghníomhach ag na mic léinn.

Le linn an chúrsa, déanfar staidéar ar Theoiric agus Cleachtas na hAteangaireachta, áit a léireofar na difríochtaí idir ateangaireacht agus aistriúchán. Ar mhaithe le mic léinn a ullmhú don saol gairmiúil atá rompu, díreofar ar ghnéithe mar scileanna cumarsáide e.g. glóroiliúint, óráidíocht phoiblí etc. Scrúdófar an eitic phroifisiúnta a bhaineann leis an gceird seo, mar aon le nósanna imeachta comhdhála, cleachtais oibre agus dálaí oibre.

Déanfar staidéar ar an dá chineál ateangaireachta ar an gcúrsa, is é sin ateangaireacht leantach agus ateangaireacht chomhuaineach. Ag deireadh an chúrsa, beidh na mic léinn in ann léiriú líofa, éifeachtach sa sprioctheanga a thabhairt ar óráid; bainfear úsáid as cleachtaí éagsúla chun oiliúint sna scileanna seo a thabhairt do na mic léinn: anailís ar an ábhar; cleachtaí cuimhne; ateangaireacht leantach gan nótaí; aistriúchán le hamharc; teicnící um breacadh nótaí.

Déanfar staidéar freisin le linn an chúrsa ar an Aontas Eorpach agus eagraíochtaí idirnáisiúnta; scrúdófar an chaoi a bhfeidhmíonn na heagraíochtaí sin ionas go mbeidh eolas maith ag na mic léinn ar phróisis agus nósanna imeachta na n-institiúidí atá i gceist.

Chomh maith leis an obair ranga, eagróidh an Ollscoil seachtain staidéir chuig Coimisiún na hEorpa agus Parlaimint na hEorpa chun léargas a thabhairt do na mic léinn ar obair na n-ateangairí comhdhála sna hinstitiúidí sin.

Ag deireadh an chláir, beidh tionscadal nó tráchtas le scríobh ag mic léinn M.A. a n-éiríonn leo 60% a bhaint amach sa Dioplóma Iarchéime, bunaithe ar thaighde ar ghné éigin den ateangaireacht.

Ábhar an chláir

Aidhmeanna agus
cuspóirí

Tá aitheantas ag an nGaeilge mar theanga oifigiúil de chuid an Aontais Eorpaigh ón 1 Eanáir 2007. Tá poist mhaithe ateangaireachta agus aistriúcháin le fáil anois in institiúidí an AE do dhaoine a bhfuil an Ghaeilge ar cheann dá dteangacha feidhme; is é aidhm an chláir seo mic léinn a oiliúint i sainscileanna ghairm na hateangaireachta comhdhála agus an t-eolas sainiúil a bhaineann leis an ngairm sin, ionas go mbeidh ar a gcumas na deiseanna fostaíochta ateangaireachta a bhaineann leis an nGaeilge a thapú.

Tá an clár seo bunaithe ar an gCéim Mháistreachta Eorpach in Ateangaireacht Chomhdhála clár a forbraíodh i gcomhar le hinstitiúidí an Aontais Eorpaigh agus atá á chur ar fáil in 18 dtír san Eoraip. Is é seo an t-aon chlár dá leithéid atá ar fáil in Éirinn.

Meáchan ECTS

60 ECTS a bhaineann leis an Dioplóma Iarchéime, 90 ECTS san iomlán a bhaineann leis an MA.

Ionad an chúrsa

Ionad an Acadaimh,
An Cheathrú Rua,
Co. na Gaillimhe.

Riachtanais iontrála

Beidh céim onóracha 2:2 chomh maith le sáreolas ar an nGaeilge agus ar an mBéarla riachtanach chun áit a fháil ar an gclár. Chomh maith leis sin, beifear ag súil go mbeidh na nithe seo a leanas ag baint leis na hiarrthóirí uile: 

• eolas ginearálta maith ar chúrsaí idirnáisiúnta agus ar chúlra eacnamaíoch, sóisialta agus cultúir na hÉireann agus na dtíortha lena mbaineann a dteanga(cha) oibre;
• cumas a n-aigne a dhíriú go géar ar ábhar nó ar obair;
• cumas anailíse agus sintéise;
• dea-scileanna cumarsáide;
• inspreagadh láidir;
• cumas oibriú faoi bhrú;
• bheith toilteanach glacadh le comhairle.
  

Critéir roghnaithe

Beidh ar iarrthóirí tabhairt faoi thriail infheidhmeachta agus agallamh chun a n-oiriúnacht don chlár a mheas, agus caithfidh siad pas a fháil iontu sin chun áit a fháil ar an gclár. 

Cáiliú don M.A.

Caithfear 60% san iomlán a bhaint amach i modúil an Dioplóma Iarchéime le bheith i dteideal tabhairt faoin MA.

Deiseanna fostaíochta

Tá deiseanna maithe fostaíochta ar fáil do dhaoine a mbeidh an clár seo déanta acu. Tá both iomlán ateangaireachta dá cuid féin le bheith ag an nGaeilge i bParlaimint na hEorpa i gceann cúpla bliain, agus poist lánaimseartha ar ardchaighdeán mar ateangairí ann dá réir. Daoine a mbeidh cáilíocht ón gcúrsa seo acu, beidh an-seans go deo acu ar na poist sin. Tá obair le fáil d’ateangairí ní hamháin san Aontas Eorpach ach anseo in Éirinn freisin; éilítear seirbhísí ateangaireachta ag comhdhálacha, tionóil agus féilte in Éirinn.

Iarratas a dhéanamh ar an gcúrsa

Nasc díreach

Tuilleadh eolais 








                                          

Susan Folan,
Acadamh na hOllscolaíochta Gaeilge,
An Cheathrú Rua,
Co. na Gaillimhe.

Fón:              +353 91 869102  
Facs:             +353 91 595041 
R-phost:         ateangaireachtoegaillimh.ie
Idirlíon:          http://www.acadamh.ie/